Бо дастгирии Ҳукумати Ҷумҳурии Тоҷикистон аз 6 то 10-уми апрели соли равон дар саросари кишвар чорабинии мутамарказонидашудаи аксияи ҷумҳуриявӣ «Ҳафтаи саломатӣ ва ҳуқуқи инсон дар Тоҷикистон” ва “Рӯзи умумиҷаҳонии саломатӣ» таҳти унвони «Якҷоя ба сӯи саломатӣ. Якҷоя ба суи илм» рафта истодааст.

Дар доираи чорабинии мазкур дар толори Донишкадаи политехникии Донишгоҳи техникии Тоҷикистон ба номи академик М.С.Осимӣ дар шаҳри Хуҷанд бо мақсади тарғиби тарзи ҳаёти солим, бардошт аз мактаби рӯзгордории модарон, баланд бардоштани фарҳанги оиладории ҷавондухтарон дар бо иштироки муовини сартабиби беморхонаи клиникии №1 шаҳри Хуҷанд, номзади илмҳои тиб, Саодат Аминҷонова, устоди кафедраи забони давлатӣ ва ҷомеашиносӣ, аъзои шӯрои занони МИҲД-и шаҳри Хуҷанд Хайринисо Темирова дар мавзӯи “Мактаби модарони оянда” мулоқоти судманд доир гардид.

Муовини директор оид ба тарбияи донишкада Назира Инъомзода ҳозиринро бо мазмуну муҳтавои мулоқот шинос намуда, аз ҷумла қайд кард, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Зан-модар ҳамчун чашмаи хушкнашавандаи ҳаёт эҳтиром дошта, таъкид медоранд: “Мо бо такя ба нексириштӣ ва азму талошҳои созандаи занон, ки воқеан илҳом ва тавонбахши ҷомеа мебошанд, Тоҷикистони азизи худро ба як давлати ободу зебо, пешрафтаву мутамаддин ва демокративу дунявӣ табдил хоҳем дод».

Ба ин маънӣ имрӯз зани тоҷик на танҳо модари мушфиқу меҳрубон ва ғамхори ҳамешагии оила аст, балки пеш аз ҳама шахсият ва узви комилҳуқуқи ҷомеа, роҳбари кордон, ҷамоатчии фаъол ва фарди созандаи бунёдгари давлати соҳибистиқлол, ҳуқуқбунёд ва демократии мост.

Номзади илмҳои тиб Саодат Аминҷонова зимни баромади худ зикр кард, ки дар вилояти Суғд зиёда аз 1,46 млн занон ва духтарон зиндагӣ мекунанд, ки қисми муҳими аҳолиро ташкил медиҳанд. Занҳо дар тамоми соҳаҳо фаъоланд, вале ба масъалаҳои саломатии репродуктивӣ ва модару кӯдак аҳамияти аввалиндараҷа бояд дод.

Тибқи маълумоти барномаҳои тандурустӣ мушкилоти асосӣ байни занҳо ин: хавфи фавти модар ва кӯдак, ҳомиладориҳои бо авориз, норасоии назорати саривақтии занони ҳомила, кам будани дониши тиббӣ оид ба аломатҳои хатари ҳомиладорӣ, ғизои носолим ва нодуруст банақшагирии фарзанддоршавӣ дар оила, байни занҳо зиёд гардидани бемории камхунӣ, бемориҳои эндокринӣ ва бемориҳои сироятӣ ва ғайрисироятӣ мебошад.

Хайринисо Темирова зимни баромади худ ба духтарон оид ба фарҳанги оиладорӣ, лаҳзаҳо аз рӯзгордории модарон, маърифати либоспӯшӣ ва баланд бардоштани руҳияи ватандӯстиву худшиносӣ сухан ронда, қайд кард, ки дар донишкада ҷиҳати гиромидошти арзишҳои фарҳангӣ, тарбияи эҳтиром ба либоси миллӣ, ҳисси зебопарастӣ, бедор намудани завқи баланди донишҷӯён ба маданияти либоспӯшӣ миллӣ имконияти васеъ фароҳам оварда шудааст.

Мулоқот бо мубодилаи афкор анҷом пазируфт.

Шуъбаи иттилоот ва кор бо ВАО